VIGAN CITY – Kinumpirmaran ni Abra Gov. Joy Bernos a maysa a seaman a naggapu idiay United Arab Emirates ti nagpositibo iti coronavirus disease iti nasao a probinsiya.
Segun ken ni Bernos, simmangpet idiay probinsia ti Abra idi March 8 ti pasyente a nagderetso idiay Manabo ket idi March 9, nakipaset iti parada ti Bangued ken napan nagbuya iti Kawayan Festival
Idi March 10, napan idiay Lorma Hospital, San Fernando City, La Union ti pasyente ta napan na binisita ti ina na a nagsakit ket idiay a nakita da a nangato ti gurigor na isu a naibilang a person under investigation.
Nagawid idiay Manabo ti pasyente ngem saan na nga inbagbaga kadagiti barangay officials nga isuna ket PUI ken saan a nagself-quarantine nu di ket napan pay nagpaspasyar idiay Baay-Licuan.
Idi simmangpet idi naminsan iti resulta ti test a naisayangkat kenkuana ken nakita a nagpositive isuna ti virus, inpasapul ni Bernos iti ayan na ket binilin da nga aghome quarantine kadua na ti pamiliana ken pabpabantayanda kadagiti pannakabagi ti linteg tapno saan a pulos a makaruar kasta met a pati iti intero a barangay Catacdegan, Nuevo, Manabo ket nakalockdown.
