Nangisayangkat ti Independent Commission for Infrastructure iti taripnong kadua dagiti nadumaduma nga ahensia tapno pagpatangan no kasano a mabawi dagiti natakaw manipud iti maanomalya a flood control project.
Segun ken ni ICI Chairman Andres Reyes, mabukel ti technical working group a mangsimpa iti koordinasion ken legal a proseso iti panangala ti pondo.
Mangipila iti civil forfeiture case ti Office of the Solicitor General, idinto nga inlawlawag ti Ombudsman a sakup daytoy ti Republic Act 1379, a mangipalubos iti pannakakumpiskar dagiti sanikua a naala iti saan a nainkalintegan a wagas.
Kiniddaw pay ti ICI iti Ombudsman a makasoan iti plunder, bribery, ken corruption da Senador Joel Villanueva ken Jinggoy Estrada, dati a kongresista a da Zaldy Co ken Mitch Cajayon, ken COA Commissioner Mario Lipana mainaig iti nasao nga anomalya.
