Immapela ni Senador Joel Villanueva a mapaalisto ti panangipasa iti gakat para iti panangituding iti living wage.
Segun ken ni Villanueva, adu a gakat ti nakapempen ita iti Senado para iti gakat a legislated wage increase.
Ngem kinuna ti senador a prayoridad ita a nalawag a maidatag ti criteria para iti living wage para iti mayannatup a minimum wage kadagiti mangmangged.
Kidkiddawen ni Villanueva a maipasa ti Senate Bill 44 a ti gagemna ket amyendaran ti Labor Code babaen iti panangital-o iti living wage framework ket maikonsiderar met ti inflation tapno masalwadan dagiti mangmangged nangruna iti panawen nga adda krisis.
Impaganetget ti agpampanday-linteg a nasken a patas ti sueldo iti kasapulan a living wage ken napateg a makita no daytoy ket masupusupanna ti inaldaw a pagkasapulan ti maysa a pamilia, adda man krisis wenno awan.
