Inlawlawag ti prosekusyon iti International Criminal Court ti maipagarup nga akem dagiti co-perpetrator ni dati a Presidente Rodrigo Duterte iti panangipatungpal ti war on drugs manipud iti panangidaulo na kas mayor ti Davao City agingga idi nagbalin isuna a presidente.
Segun ken ni Prosecutor Robynne Croft, adda maipagarup nga ‘hierarchical structure’ a binukel ni Duterte a dagiti bilin ken manipud kenkuana a naited kadagiti opisial ken miembro ti Davao Death Squad (DDS).
Karaman kadagiti nainaganan a co-perpetrator ti dati a presidente ket da senador Ronald dela Rosa, Christopher Bong Go, Vitaliano Aguirre II ken dadduma pay.
Segun ti prosekusyon, basar iti maysa nga insider witness, ti sao nga ‘neutralize’ iti memorandum ket nausar tapno ibaga ti bilin a panagpatay.
Pinasingkedan pay ti prosecutor a maipagarup a kontrolado dagiti co-perpetrator ti ehekutibo, Philippine National Police, Philippine Drug Enforcement Agency, Bureau of Investigation ken Department of Justice a maipagarup a nagresulta ti ‘climate of impunity’.
