Adda bileg ti impeachment court kas panangsurot iti nakatuding iti 1987 Constitution nga ammoen ti amin a hidden-wealth ni Vice President Sara Duterte a saan a naideklarar iti Statement of Assets and Liabilities and Network (SALN).
Daytoy ti pinasingkedan ni House Prosecutor Akbayan Rep. Chel Diokno iti opening statement iti maika-innem nga impeachment trial ni VP Sara.
Impaganetget ni Diokno a simple laeng ti isyu a sangsangoen iti agdama ti pagilian ngem maibilang daytoy a nadagsen.
Kiniddaw ti prosecution a mangiruar ti subpoena duces tecum iti amin a bank records, tax records ken Anti-Money Laundering Council reports nga adda pakainaiganna iti bise presidente ken ti asawana a ni Atty. Mans Carpio.
Innayon ni Diokno a babaen kadagituy a dokumento a kidkiddawen ti prosecution ket mailanad ti husto a mainaig iti alegasion iti Article II ti Articles of impeachment.
