Posible a permanente nga i-ban wenno maipariten ti gaming platform a GoreBox iti Pilipinas gapu iti pannakapaay ti developer a mangipalawag ti nayon a safeguards dagiti otoridad kas pinasingkedan ti Cybercrime Investigation and Coordinating Center (CICC).
Maipalagip nga insigida a blinock ti ahensia ti GoreBox kalpasan iti pammaltog iti San Jose National High School idiay Tacloban City idi June 22 a nakatayan iti tallo nga estudyante ken nakadunoran iti dadduma pay.
Immunan a pinasingkedan dagiti otoridad a posible a nakaimpluwensya iti dua a menor de edad a suspek ti nasao nga ay-ayam tapno isayangkat ti nakaru a pammaltog iti pagadalan.
Segun ti cybercrime agency, isublida laeng ti access ti sandbox game no adda umdas a safeguards tapno salakniban dagiti user.
Pinasingkedan met ni CICC Executive Director Renato Paraiso a ti panagkeded ti developer ti Gorebox a ni Felix Filip a sumango iti Philippine authorities tapno agpalawag no adda umdas a safety checks ti Gorebox wenno awan ket mabalin nga agresulta iti saan a panangibabawi ti ban a naipataw idi Hunyo 23.
