Nakasagana ti gobierno a risuten ti agtultuloy a rally iti EDSA, kagiddan ti panangraem ti karbengan dagiti umili a nakipaset iti protesta.
Segun ken ni Palace Press Officer Usec. Atty. Claire Castro, priyoridad ti gobierno ti kinatalged ti publiko ken ti panangliklik kadagiti darakkel a makaapektar kadagiti motorista ken commuters.
Adu dagiti naapektaran ti kellaat a panagsangpet dagiti raliyista iti Edsa, pakairamanan dagiti adda emergency a kasapulan a dumalan iti kangrunaan a pagdalayasatan.
Innayon ni Castro nga uray maawatan ti gobierno ti gagem ti protesta, mabalin daytoy a saan a maawatan ti publiko no ad-adu dagiti maapektaran a tattao gapu iti panang-protektar iti maysa nga indibidwal.
Kabayatanna, pinasingkedan ni Castro nga awan ti makitkita a pangta ti Malakanyang manipud idi napasamak ti surprise rally.
Agtultuloy latta met nga imon-monitor ni Presidente Ferdinand Marcos Jr. ti sitwasion gapu ti epekto na daytoy iti trapiko kasta payen kadagiti motorista, mangmangged, estudyante ken dagiti pasiente a magmagna iti EDSA
