Nagkiddaw ti tulong iti gobierno iti International Criminal Police Organization (Interpol) tapno matunton iti ayan ni dati a Cong. Zaldy Co a maitudtudo a karaman iti maanomalya a flood control projects.
Inamin ni Acting Justice Secretary Frederick Vida nga agingga ita ket saanda pay nga ammo nu ayan ni Co kalpasan a pimmanaw iti pagilian idi Agosto.
Ti panagsarita ni Vida ket kasaruno dagiti saludsod nu apay nga agtaltalinaed iti abroad ni Co iti baet a maim-imbestigaran gapu iti pannakairamanna iti binilion a pisos nga anomalya iti flood control projects idiay Bicol ken dadduma pay a rehiyon.
Inlawlawag met ti opisyal a saan a mabalin a makanselar ti passport ti dati nga agpampanday linteg malaksid laeng nu ibilin ti Regional Trial Court kas paset ti due process a maipapaay kadagiti amin a Pilipino.
