VIGAN CITY – Pinalagipan ni Gov. Ryan Luis Singson dagiti agindeg a saan a gapu a naisakupen iti general community quarantine ti probinsia ket nawayadan nga agaramid iti kaykayatda agsipud ta saan pay laeng a nalpas iti laban ti probinsiya kontra ti COVID- 19.
Segun ken ni Gov. Singson, kiddawenna iti pannakitinnulong ken disiplina iti tunggal maysa tapno mapagtalinaed a COVID-free ti probinsia ta no awan dagiti nasao a banag ket maisubli manen iti pannakaisakup ti probinsia iti enhanced community quarantine.
Awan pay laeng ti pinal a pagannurotan nga inyetnag ti gobernador para ditoy probinsia mainaig iti pannakaipatungpal ti GCQ ngem mapalubosan ti tunggal local government unit babaen iti pannakikinnammayet da ti Inter-Agency Task Force a mangaramid ti guidelines a suroten ti publiko.
Inlawlawagna a no maipanggep ti transportasyon ket maiyuray pay ti final guidelines ti Department of Transportation ngem maiparit pay laeng iti agkalubbon iti motorsiklo.
Awan iti inyetnag ti provincial government a pannaka-ikkat ti liquor ban ta maka-ammo dagiti mayor nga agdesisyon nu ikkaten da wennu saan iti nasao a pagannurutan ngem nagballaag ti gobernador a nu adda iti madangran gapu iti arak ket isun a mismo iti mangipatungpal ti liqour ban iti intero a probinsiya.
Kabayatanna, awan pay laeng iti klase dagiti agad-adal ken saan pay a malukatan dagiti hotels ditoy probinsiya idinto a dagiti restaurant wennu panganan ket mapalubusan dan nga aglukat ngem agpatingga da laeng iti take-out service.
