Impaganetget ni Parañaque 2nd District Rep. Brian Yamsuan a rumbeng nga ipangruna ti Department of Education (Deped) ti panagisuro ti Good Manners and Right Conduct (GMRC) gapu iti panagado ti school violence.
Segun ti agpampanday linteg, masansan a mailaklaksid ti GMRC subject kadagiti pagadalan iti baet a napateg dayta tapno mamuli dagiti agtutubo isu a rumbeng laeng a maisuro a seryoso.
Kinunana a dagiti mapaspasamak kadagiti uneg ti pagadalan kas ti bullying ken kinaranggas ket rumbeng nga agbalin a wake-up calls iti gobierno, dagiti mangisursuro ken nagannak tapno agtitinnulong a seryosoen ti panagisuro ti GMRC tapno masuroan dagiti ubbing iti nasayaat nga ugali.
Nagsarita ni Yamsuan, makalawas kalpasan ti shooting incident iti Ateneo de Zamboanga University a naka-livestreaman ti panagpaltog ti suspek iti maysa a junior high school student.
