VIGAN CITY – Umaboten ti sangagasut walopulo ket lima a milyon a pisos ti gatad dagiti nadadael iti sektor ti agrikultura ken innem a milyon a pisos iti sektor ti fisheries gapu iti bagyo Ambo.
Iti pannaki-uman ti Bombo Radyo Vigan kenni Agriculture Secretary William Dar, kaaduan kadagiti nadadael ket dagiti mula a mais, pagay, nateng ken patienna a no saan a nasapsapa a nagballaag ti Philippine Atmospheric Geophysical and Astronomical Services Administration (PAGASA), posible a naad-adu pay ti nadadael.
Pinasingkedan ti opisial a ti Visayas ken Bicol region ti kangrunaan a naapektaran ngem no pay kasta, impasiguradona a nakasagana ti DA a mangtulong kadagiti mannalon a naapektaran babaen iti panangipaayda kadagiti bukel a maimula nangruna tatta a panagtutudo.
Tapno maawat dagiti mannalon ti tulong nga aggapu iti nasao nga ahensia, kasapulan a nakarehistroda iti Philippine Crop Insurance Corporation ket dagiti saan pay laeng a nakarehistro, rumbeng met a karamanda iti imbentaryo ti Municipal Agriculture Office ta isuda ti mang-validate kadakuada ngem inyunay-unay latta met ti opisial ti panagparehistroda.
