Impila ti Makabayan Bloc ti gakat a mangdisqualify kadagiti government contractor nga agbalin a party list nominees.
Dayta ket iti baet dagiti alegasyon a mainaig iti maysa nga agdama a party list lawmaker ken maysa a nagikkat a party list representative iti mapapati nga anomalia iti infrastructure projects iti gobierno.
Iti salinong ti House Bill 6193, awan iti indibidual a mabalin a ma-qualify a party list nominee a nagbalin a kontraktor iti aniaman a proyekto iti gobierno pakairamanan ti infra projects, maysa man nga indibidual, incorporator, director, officer wenno tao nga adda pakainaigan iti maysa a korporasyon a nagbalin a kontraktor.
Maiparit pay iti gakat dagiti dati a nagserbi a bise mayor, bise gobernador, gobernador, kongresista, senadoe, bise presidente ken presidente nga in-nominate ti party list groups kas mangibagi iti kongreso.
Sakupna pay dayta dagiti indibidual nga adda pakainaigan dagiti opisyal ti gobierno agingga 4th degree of consanguinity, dagiti nagserbi a bureau chief agingga aniaman a posisyon iti Gabinete iti uneg ti lima a tawen, dati a provincial police directors, Armed Forces battalion commanders wenno aniaman a nangato a posisyon iti uneg iti lima a tawen kasta payen dagiti indibidual a ti income-na ket nasursurok pay ngem iti base pay ti partylist representative iti Kamara.
Maimandato pay iti gakat a dagiti nominee ket rumbeng a karaman kadagiti marginalized ken underrepresented sector.
