Naipasa manen iti Senado iti maikatlo ken maudi a pannakaibasa ti Senate Bill No. 1905 wenno ti Magna Carta for Barangay Health Workers (BHWs), ti gakat nga induron ni Senate Senior Deputy Majority Leader JV Ejercito kas principal author ken sponsor.
Idi 19th Congress, immunan a naaprubaran ti gakat iti Senado ken in-adopt payen ti Kamara ti bersion ti Senado ngem nabitin kalpasan nga imbabawi ti House of Representatives ti gakat iti maudi a lawas idi napalabas a Kongreso.
Segun ken ni Ejercito, saan nga agsardeng agingga saan nga agbalin a linteg ti gakat a nabayagen nga ur-urayen dagiti rinibo a Barangay Health Workers iti intero a pagilian.
Innayonna a panawenen tapno ipaayan ti BHW a nabayagen nga agserserbi nga umuna a pagtarayan dagiti Pilipino iti patangan ti salun-at.
Impaganetgetna a napaneknekan dagiti BHW iti kinabannuarda kangrunaan idi pandemia, ngem agingga ita ket kurang latta ti suportar, nababa iti honorarium, ken masansan ket bukod a kuartada pay iti ar-aramatenda iti panangtulong kadagiti kalugaranda.
