Indeklarar ni Department of Agriculture (DA) Secretary Francisco Tiu Laurel Jr. ti food security emergency iti bagas ditoy pagilian kas inrekomendar ti National Price Coordinating Council.
Segun ken ni Laurel, ti emergency declaration ket mangpalubos kadakuada a mangiruar ti rie buffer stocks ti National Food Authority tapno mastabilize ti presyo ken masigurado a ti bagas ket agtalinaed nga accessible kadagiti consumer.
Immunan a pinasingkedan ni President Ferdinand Marcos Jr. a ti nasao a deklarasyon ket tapno mapuersa ti pannakapalaka ti presyo kalpasan nga inaramiden iti amin a kabaelan iti gobierno.
Kinuna ni Marcos a nagtalinaed a nangina ti presyo ti bagas iti merkado uray naipalaka ti cost of production.
Ti Rice Tarrification Law ket mangted ti bileg ti Agriculture chief a mangideklarar ti food security emergency kas panagtignay iti nangina a presyo ken tapno direkta ti National Food Authority a mangiruar ti buffer stocks kadagiti government agencies, local government units ken KADIWA ng Pangulo program tapno mastabilize ti presyo ti bagas.
Epektibo nga insigida ti circular ket agtalnaed a maipatungpal agingga ikkaten ti Agriculture secretary.
Iti agdama ket adda buffer stock ti NFA a 300,000 metric tons iti bagas, a ti kaguduana ket manamnama a maiwaras iti sumaruno nga innem a bulan tapno masigurado nga umanay ti suplay nu adda emergencies wenno disaster response.
