Napilaanen ti kaso nga adda pakainaigan ti korapsyon ni dati nga Education Minister iti Indonesia a ni Nadiem Makarim gapu iti mapapati nga irregularidad iti panaggatang kadagiti laptop para kadagiti pagadalan idi covid-19 a nagresulta iti pannakalugi ti estado iti 2.1 trillion rupiah wenno $125.64 million.
Ni Makarim ket nagserbi nga education minister manipod 2019 agingga 2024 kalpasan a nagikkat a CEO ti Gojek ken naakusaran a nakapastrek iti 809 billion rupiah.
Mapapati a nagtaud iti sapul ni Makarim iti panaggatang ti Chromebook laptops ken Chrome OS software manipod 2020 agingga 2022.
Segun ti prosecution, ginatang latta ti opisyal ti Chromebook laptops uray idi 2018 ket naadal ti gobierno a saan a mayannatup ti device idiay Indonesia gapu iti pagkurangan ti internet connectivity a maysa a dakkel a parikot iti adu a nasulinek a lugar iti pagilian.
Mapapati pay a nakikunsabus pay ni Makarim idi 2020 kadua dagiti mangibagi ti Google Asia Pacific ken Google Indonesia sakbay a naisayangkat ti procurement.
No mapaneknekan a nagbasol ket posible a sumango ti dati nga opisyal iti maximum sentence a duapulo a tawen a pannakaibalud.
