Dead on arrival ti maysa nga estudyante a nagmaneho iti motorsiklo iti pannakaaksidentena iti National Highway idiay Barangay San Nicolas, San Esteban, Ilocos Sur idi kalman October 2, 2024 iti oras ti alas onse baente nuebe iti bigat.
Ti nagmaneho iti Suzuki Raider 150 motorcycle nga agmaris iti violet ken black ket agtawen iti duapulo nga agnaed idiay Barangay Turod, Narvacan, Ilocos Sur.
Maibasar iti CCTV footage, agturong ti amianan a direksyon ti motorsiklo ket idi nadanonna iti nasao a lugar kangrunaan iti sharp curve portion ket naawanan ti balanse ti driver a gappuanan iti pannaaksidentena ket naidungpar pay iti likod a paset iti Mitsubishi Aluminum van a nakaparking iti daya a paset iti kalsada.
Gapu ti sinagaba a dunor iti agduduma a paset ti bagi ti driver ket naipan iti Ilocos Sur District Hospital – Narvacan tapno koma mataming ngem naideklarar a natay.
