VIGAN CITY – Nauram ti maysa a dragon fruit farm a kukua iti Eagle Vision idiay Sitio Manganop, Barangay San Sebastian, San Vicente idi kalman, February 9.
Inpakaammo ni Lito Abalos nga agtawen ti lima pulo ket walo, naasawaan, awanan trabaho nga agnaed iti nasao a lugar nga adda nakitana a bassit nga uram a nangrugi iti akin-amianan a paset iti pagtaengan ni Niño Rosasina idi bigla a dimmakkel iti apoy nga agkaykayamkam gapu iti napigsa nga angin ket nairaman iti dragon fruit farm.
Mapatta-patta nga aggatad ti dua pulo ribo a pisos dagiti nadadael a sanikua gapu ti nasao nga uram.
Nu pay kasta ket awan met iti nadangran iti nasao nga uram ken ti makitkita a rason dagiti otoridad a nagtaudan iti apoy a nagkayamkam ket iti napanawan a nauram a basura.
Kabayatanna, nauram iti likod ti Mart One Building idi rabii ditoy siyudad a nakairamanan ti maysa a carinderia a kukua ni Mary Grace Montano nga agnaed idiay Nagsangalan, Vigan ken maysa a clinic, ta naaramid iti light materials dagiti nauram.
Saan a nagpaot iti nasao nga uram ta nakontrol met laeng dagiti kameng ti Bureau of Fire protection- Vigan City.
Segun kenni Rosel Ponce, nagpaarayat da kadagiti otoridad idi nakita da iti uram ket patta-pattaen da a nagtaud iti apoy a nagkayamkam iti paglutuan ti Mary Grace Carinderia ta iti batog iti paglutuan iti nagkayamkaman iti uram kas maibasar iti pannakakitana.
