Nadunor dagiti dua a driver iti motorsiklo kalpasan a nagdinnungparda iti National Highway idiay Barangay San Clemente, Magsingal, Ilocos Sur.
Nabigbig ti driver ti Yamaha Smash 125 MC nga agtawen iti duapulo ket maysa, awan Driver’s License-na, ken agnaed iti Barangay San Pablo, Sto. Domingo; idinto a ti driver ti Yamaha Aerox 155 MC ket agtawen iti duapulo ket maysa, awan Driver’s License-na, ken agnaed iti Barangay San Clemente, Magsingal.
Agturong iti bagatan a direksyon ti nagmaneho ti Yamaha Smash 125 MC, idinto a ti Yamaha Aerox 155 MC ket agturong iti bangir a direksyon.
Saan a na-control ti driver ti Yamaha Aerox 155 MC ti manibela ti luganna a nangitunda ti pannakadungpar ti driver ti Yamaha Smash 125 MC a gappuanan iti pannakadunorda.
Dagus a nagresponde dagiti kameng ti Bureau of Fire Protection (BFP) ken Philippine National Police (PNP) apaman a naawatda ti impormasyon maipanggep iti nasao a pasamak ken naipan dagiti bikitima iti Ilocos Sur District Hospital-Magsingal para iti naan-anay a pannakatamingda.
Kabayatanna, dagiti lugan a naaramat ket adda itan iti kustodia ti Magsingal Municipal Police Station (MPS) para iti husto a proseso ken disposition. – Augie Arellano
