VIGAN CITY – Dua a menor de edad a nagkalubbon iti motorsiklo ti naipaagas iti ospital kalpasan ti pannaka-aksidenteda idiay Barangay Immayos Norte, San Juan.
Agtawen iti sangapulo ket pito ti drayber a menor de edad idinto a ti kinalubbonna ket agtawen iti sangapulo ket lima, agpada a construction workers ken agnaed idiay Sitio Tokyo, Barangay Barbar, San Juan.
Iti pannaki-uman ti Bombo Radyo Vigan ken ni Police Major Christopher Ramat iti San Juan Police Station, nakainom dagiti menor de edad kabayatan ti panagawidda a nakalugan iti motorsiklo.
Agpapadaya a direksyon ti motorsiklo idin ta saan a nakontrol ti drayber ti manibela ti luganna ket naidungpar iti steel light post.
Gapu dayta, natukkol ti saka ti drayber ken ti backrider ken nagsagabada pay ti dunor iti ulo.
Kabayatanna, nangisingasing ti San Juan Police Station iti LGU-San Juan a maingato ti sigud a PHP500 penalty dagiti menor de edad nga agmanmaneho iti dua ribo a pisos para iti first offense; dua ribo lima gasut iti second offense; ken tallo ribo iti third offense ta no lima gasut laeng ket adu dagiti mangiyaleng-aleng.
Malaksid dayta ket ma-impound ti motorsikloda ken dumalan iti counseling dagiti menor de edad.
Kiniddaw met ni Ramat kadagiti agnaed iti ili ti San Juan a saanda nga itulok a rumuar dagiti kameng ti pamiliada a nabartek nangruna dagiti menor de edad nga agmaneho agsipud ta saanda pay la ammo unay dagiti paglintegan iti kalsada.
