Gasgas iti agduduma a paset ti bagi ti sinagaba dagiti dua a driver ti motorsiklo gapu iti panagdinnungparda iti Barangay Road idiay Palali Sur, Sta. Lucia, Ilocos Sur itay malem, June 18, 2026.
Ti nagmaneho ti TMX 125 motorcycle ket lalaki nga agtawen iti sangapulo ket walo, construction worker, awanan ti driver’s license, saan a nagaramat ti helmet nga agnaed idiay Barangay Sapang, Sta. Lucia.
Ti nagmaneho met iti Red Rusi 150 motorcycle ket lalaki nga agtawen iti tallopulo ket uppat, construction worker, awanan ti driver’s license nga agnaed idiay Barangay Conconig East, Sta. Lucia.
Segun kadagiti nakakita, agpapalaud ti TMX idinto nga adda iti bangir a linya ti Rusi idin nadanonda iti nasao a lugar ket naawanan ti kontrol ti manibela ti driver ti TMX isu a naipan iti linya ti Rusi a gappuanan ti panagdinnungparda.
Gapu ti sinagaba dagiti dua a driver ket naipanda iti Sta. Lucia District Hospital para iti pannakatamingda.
