Nakemmeg dagiti dua a high-profile individual gapu iti panagramesda iti maysa nga ubing iti Vigan City, Ilocos Sur
Iti pannaki-uman ti Bombo Radyo Vigan ken ni PLt. Amado Somera Jr. a Deputy Chief of Police iti Vigan City Police Station, dagiti nakemmeg ket maikapat ken maikalima a most wanted individuals nga agpada nga agnaed iti siudad ti Vigan.
Segun ken ni Somera, balligi iti pannakakemmeg dagiti dua babaen ti warrant of arrest iti kaso a rape nga awan ti nairekomendar a pyansana nga inruar ti Family Court Branch 7, Vigan City.
Pinasingkedan ni Somera a tawen 2021 pay laeng idi rinames dagiti dua ti maysa nga agtawen iti sangapulo a babai ngem idi laeng September 26, 2024 a naitured ti biktima a nagipulong ta naallukoy iti riknana a nangamin iti pannakaramesna idi adda naisayangkat a security reminders dagiti pannakabagi ti linteg iti pagadalanda.
Inlanad ti biktima nga idi bimmisita iti pagtaengan ti lolana iti siudad ti Vigan idi 2021 ket isu iti pananggundaway kenkuana dagiti suspek a mapapati a naka-inom iti nasanger kadagita a panawen.
Bayat ti pannaturogna ket kellaat a pinilit nga inruar isuna ti maysa kadagiti suspek ket impanda iti sabali a kuarto nga isu ti nangramesanna ken simmublat ti maysa pay a lalaki ket kalpasanna, binutbutengna a papatayenda nu ibagana iti inaramidda kenkuana.
Gapu ti buteng ti ubing ket saan a nagsasao ket inlimedna iti napasamak ngem gapu iti naadalna nga insuro dagiti otoridad ket natibkerna nga inamin iti maestrana ket isu metten ti pannakatakkuat ti nagannakna a gappuanan ti panagreportda kadagiti otoridad.
Apaman a naireport ket naisayangkat iti pannakakemmeg kadagiti suspek iti siudad ti Vigan isu nga iti agdama ket nakakustodiyada iti Vigan City Police Station para iti documentation sakbay iti pannakaturn-over da iti nasao a korte.
VIDEO – PLT. AMADO SOMERA JR.
Kabayatanna, palagip ni Somera kadagiti nagannak iti panangmonitor ken panangtarabayda kadagiti annakda tapno mailiklik iti aniaman a mabalin a pakaisagmakanda.
VIDEO – PLT. AMADO SOMERA JR.
