Dua a drug suspect ti nakemmeg babaen iti naiwayat a search warrant operation iti Barangay Ballaigui, Sinait.
Subject ti operasyon ni Judie Agbayani Bayuga, agtawen iti tallopulo ket pito, taga-Barangay Ballaigui iti nasao nga ili ken adda kaduana a ni James Louie Rangcapan, agtawen iti duapulo ket tallo, taga-Barangay Jordan.
Naala kadakuada ti sangapulo ket tallo a heat-sealed transparent plastic sachet a naglaon iti mapapati a shabu nga agdagsen iti 4.6 grams nga aggatad iti PHP31,280.
Malaksid dayta, adda pay tallo a tooter tube, nadumaduma a pakete ti sigarilyo, dua a lighter, cellphone ken bassit a pitaka para iti candy mint.
Iti pannaki-uman ti Bombo Radyo Vigan ken ni Police Captain Bryan Lopez, ti suspek a ni Bayuga ket maysa a drug reformist ta datin a nabalud idi gapu iti iligal a droga.
Innayonna a napaot pay sakbay a nastrekda ti pagtaengan ti suspek agsipud ta rinikpanna ida ngem nakipatang a nasayaat dagiti pannakabagi ti linteg.
Bayat ti panangsipsiput dagiti pannakabagi ti linteg ket namonitorda nga iti laeng ili ti Sinait ti lugar ti operasyon ti suspek.
