Nagpalagip ti Department of Trade and Industry iti publiko a gumatang laeng iti palpalibang manipud kadagiti lisensiado a manufacturer ita nga umadanin ti Baro a Tawen.
Segun iti DTI, liklikan ti aggatang iti generic fireworks nga awan label-na, kanayon a basaen ken suroten ti instructions sakbay nga aramaten, ken saan nga aramaten no saan a sigurado ti kinatalgedda.
Saan a piduten ti palpalibang a saan a pimmutok ken saan a pagbalinen nga angaw wenno pangkigtot iti sabali.
Pagtalinaeden a nakarikep ti tawa ken arwangan tapno saan a makastrek ti palpalibang, ken umadayo bayat ti panagbuya.
Para iti natalged a panagsindi, agaramat iti atiddug a pole ken agisuot iti goggles wenno glasses tapno masalwadan ti mata.
Kadagiti met agbuya iti fireworks, nasaysayaat no cotton wenno denim ti kawes imbes a polyester, ken sapatos imbes a tsinelas.
Balakad ti DTI nga agisagana iti timba ti danum wenno hose ken first aid kit no kas bilang adda maaksidente.
