Siguradoen ni Department of Social Welfare and Development (DSWD) Secretary Rex Gatchalian ti nalawlawa ken comprehensive a suporta ti DSWD tapno matulongan dagiti pamilia a nakaro a naapektaran ti Bagyo Uwan idiay Ilocos Region.
Iti personal a panagbisita ni Sec. Gatchalian iti probinsia ti Pangasinan ken La Union, indetalyena ti nayon a tulong ken programa a maipaay kadagiti kagimungan a naapektaran ti bagyo, partikular iti rehabilitation phase-da, a pokusan ti ahensia ti panagsubli ken pannakapasayaat ti kasasaadda.
Karaman kadagiti tulong nga isagot ti DSWD dagiti proyekto a mangtarimaan kadagiti nadadael nga imprastruktura ken mangipaay kadagiti gundaway para iti pannakapabiag manen.
Kagiddan ti panagbisita ken panangipaay ti tulong, impasigurado met ni Gatchalian a nasinged ken agtultuloy ti pannakikoordinar dagiti DSWD Field Office kadagiti nadumaduma a lokal a gobierno iti Ilocos Region para iti agtultuloy a pannakaiwaras dagiti relief good, pakairamanan ti taraon, danum, ken dadduma pay a kasapulan, ken para iti naparpardas a pannakaipatungpal ti programa ti Emergency Cash Transfer (ECT) para kadagiti pamilia a partially wenno totally damaged ti pagtaenganda gapu iti nakaro nga epekto ti bagyo.
Impaganetget ti opisyal a dakkel ti maitulong dagiti maiwarwaras a food pack ken ti cash assistance a maipaay kadagiti pamilia tapno dagus a rugianda ti panangtarimaan kadagiti nadadael a pagtaenganda ken pannakaisubli ti pagbiaganda. Augie Arellano
