VIGAN CITY – Kaso a panaglabsing ti Republic Act 9165 wenno ti Comprehensive Dangerous Drugs Act of 2002 ti sangwen ni Demetrio Javier, agtawen ti limapulo ket tallo nga agnaed iti Brgy, Codoog, Narvacan a nakemmeg idiay Brgy. Orence babaen iti naiwayat nga anti-illegal drug operation.
Segun ken ni Police Captain Arcadio Viloria, hepe ti Narvacan Police Station, datin a drug surrenderee ti suspek ken masansan ti panagistambayna iti ruar ket no sumipngeten ket isu ti gundawaynan nga agiywat ti shabu kadagiti padana nga agar-aramat ken pinaglibakan ti suspek ti iligal nga aramidna.
Naala kenkuana ti aggatad ti talloribo a pisos ken agdagsen ti 0.04 a gramo ti heat-sealed transparent plastic sachet a naglaon ti mapapati a shabu ken nagserbi a buy bust item; dua a babassit a heat-sealed transparent sachet a naglaon ti shabu; maysa a cellphone; ken motorsiklo.
Agtultuloy ti panangbantay dagiti pannakabagi ti linteg ti Narvacan kadagiti drug surrenderee ken ti naan-anay a panagimbestigarda no siasino ti source ti suspek.
