Nadunor ti maysa a drayber ti motorsiklo a nakatukbob iti kurong-kurong iti national highway ti Barangay San Clemente, Magsingal, Ilocos Sur.
Ti drayber ti kurong-kurong ket lalaki nga agtawen iti limapulo, idinto a ti motorsiklo ket minaneho ti maysa a lalaki nga agtawen iti tallopulo ket dua.
Iti pannaki-uman ti Bombo Radyo Vigan ken ni PLT. Richard Pajo, agpada nga agpapa-abagatan dagiti dua a lugan ket idi madanonda ti nakapasamakan ti aksidente, nainayad a nagsardeng ti kurong-kurong iti outer lane ti kalsada.
Iti dayta a gundaway, saan a nadlaw ti napaspas patarayna a motorsiklo iti likudan ti kurong-kurong ket natukbobna.
Gapu dayta, nadunor ti drayber ti motorsiklo idinto a ti drayber ti kurong-kurong ket saan met a naan-ano.
Naduktalan a nakainom ti drayber ti motorsiklo idi napasamak ti aksidente.
