Maysa ti natay idinto a maysa ti nadunor iti panagdinnungpar ti SUV ken motorsiklo iti national highway ti Barangay Aggay, Bantay, Ilocos Sur.
Nabigbig ti nagmaneho iti Suzuki Ertiga nga SUV a ni Justine Bryant Querubin Castillo, agtawen iti duapulo ket uppat, med tech, taga-Barangay Naguilian, Caoayan, inluganna da Mica Taay Soriano, agtawen iti duapulo ket uppat, med tech, taga-Barangay Binalayangan, Sto. Domingo.
Ti met nagmaneho iti Honda TMX ket saan pay a nabigbig.
Iti pannaki-uman ti Bombo Radyo Vigan ken ni PCAPT. Sherwin Beronia, agpapalaud ti SUV idinto nga agpadaya met ti motorsiklo ket idi nadanonda ti nakapasamakan ti insidente, immagaw ti linya ti motorsiklo ket nagdinnungparda ti SUV.
Gapu iti kapigsa ti impact, naipurwak ti drayber iti nasurok kumurang sangapulo a metro manipud iti nakapasamakan ti insidente.
Nagsagaba iti nakaro a dunor ti drayber ti motorsiklo a naipaagas iti ospital ngem naideklarar a dead on arrival.
Saan met a naan-ano ti drayber ti Ertiga ngem ti pasaherona ti nadunor iti akin-kannawan a takyagna a naipaagas iti ospital para iti pannakatamingna.
