Natalged dagiti naglugan iti van kalpasan ti pannakatukbobna iti sarsarunwenna a trailer truck iti national highway ti Barangay Bacsil, San Juan, Ilocos Sur.
Ti trailer truck ket minaneho ti maysa a lalaki nga agtawen iti tallopulo ket pito, taga-Santa Cecilia, San Nicolas, Ilocos Norte.
Ti met Toyota Super Grandia ket minaneho ti maysa a babai nga agtawen iti duapulo ket lima, taga-Bacarra, Ilocos Norte.
Agpada nga agpapa-amianan dagiti dua a lugan ket idi madanonda ti nakapasamakan ti aksidente kangrunaan iti agsang-at a kalsada, nagpreno ti trailer truck gapu iti nadagsen a kargana ket natukbob daytoy ti sumarsaruno a van.
Gapu dayta, nadadael ti sangwanan a paset ti van ngem awan ti naan-ano kadagiti naglugan.
Saan a nadlaw ti drayber ti trailer truck ti napasamak ken intultuloyna ti nagdalyasat nga agpa-amianan ngem nasitar isuna dagiti pannakabagi ti linteg ti Sinait Police Station apaman nga inalarma ida ti San Juan Police Station ken dagiti kabangibangna pay a kuerpo ti kapulisan.
