Nagpalagip manen ti Department of Health iti publiko nga agannad kontra leptospirosis iti baet ti napigsa a tudo ken layus iti nadumaduma a paset ti Metro Manila.
Segun ken ni Health Secretary Teodoro Herbosa, agingga kabaelan ket liklikan ti mapan iti danum ti tudo ngem no talaga a kasapulan ket dagus nga agbuggo iti bagi.
Insingasing pay ti secretary a kumonsulta iti doktor wenno health center iti uneg ti maysa agingga dua nga aldaw.
Iti kaudian a record ti DOH, 3,785 ti kaso ti leptospirosis iti pagilian ita a tawen, a nangatngato ngem iti 3,605 a nairekord idi napan a tawen.
Idi July 21 agingga August 3 ket immaboten iti nasurok maysa ribo ti nairekord a kaso gapu iti Bagyo Carina ken habagat.
Segun iti DOH, no saan nga agannad ti publiko ket posible a ngumato dagiti kaso ti leptospirosis gapu iti layus nga epekto ti Bagyo Enteng.
