Madanagan ni Presidente Ferdinand Marcos Jr. kadagiti mapaspasamak a riri iti Senado, pakairamanan ti insidente a panagpaputok ti paltog, walkout ti minority bloc, ken alegasion iti baro a Senate coup.
Segun ken ni Marcos, nakaladladingit ti kasasaad ti Senado kumpara idi isuna ket maysa a senador.
Pinasingkedan ti presidente a dati ket adda ti debate ngem agtaltalinaed ti propesyonalismo ken awan ti mapasamak a personal a riri dagiti senador.
Kabayatanna, impaganetget ni Presidente Ferdinand Marcos Jr. a saan na a maawatan no kasano a masimpa ken maaramid ti responsibilidad ti Senado no mairaman daytoy iti agduduma nga insidente ken pasamak.
Immuna nga imbaga ti Malakanyang a masapul a sungbatan ti Senado no kasano a nakaruar ni Senador Ronald Bato dela Rosa iti pasdek da nga adda iti salinong ti protective custody.
Innayon pay ni Marcos a saan na nga ipagarup nga umabot iti kastuy a sitwasion ti Senado.
