Nagballaag ti Department of Health kadagiti posible nga itunda ti nakaro a kinabara ti panawen kagiddan ti opisial a panangrugin ti kalgaw kas iti heat stroke, sakit iti kudil kas ti sunburn, baliling-et (prickly heat), panagkamata (sore eyes) ken food poisoning.
Mabalbalakadan ti publiko nga agaramat iti sunscreen nga SPF 30+, agsuot kadagiti napresko a kawes ken sansanen ti panagdigos tapno maliklikan ti iritasyon iti kudil.
Nasken pay a masigurado ti husto a panagidulin iti taraon tapno maliklikan ti pannakasabidong.
Isingsingasing ti DOH ti panaginom iti adu a danum, panangliklik iti init manipud alas nuebe iti agsapa agingga alas kuatro iti malem, ken aglinong no adda iti ruar.
Dagiti makarikna iti nakaro a panagulaw wenno pannakatalimudaw gapu iti kinabara ti panawen ket nasken nga ipan a dagus iti ospital.
