Kagiddan ti umadani a Paskua ken Baro a Tawen ket nairuar dagiti baro a nagan dagiti maiparit a palpalibang ditoy pagilian.
Karaman kadagiti baro a nagan dagiti palpalibang ket pakairamanan ti “Curlee ken Sarah Discaya,” “Zaldy Co,” “Senator Imee,” “Tino,” ken “Uwan.”
Segun ken ni Provincial Director idiay Bulacan a ni Col. Angel Garcillano, inaramid dagiti sumagmamano a pabrika idiay Bulacan dagiti palpalibang ket impanaganda kadagiti personalidad a karaman kadagiti maanomalya a flood control project ken dagiti napigsa bagyo a dimmuprak iti pagilian.
Kabayatanna, pinaingetda ti operasion kontra kadagiti illegal manufacturers nga agar-aramid ti delikado a palpalibang.
Imbilin pay ti provincial director dagiti amin a chief of police ti Bulacan a kompiskaren dagiti maiparit a palpalibang sakbay a mangrugi ti holiday rush.
