Agipila ti Department of the Interior and Local Government (DILG) iti reklamo nga administratibo ken kriminal kontra kadagiti uppat a pulo ket lima nga opisyal iti Bureau of Fire Protection (BFP), pakairamanan dagiti dua a dati a fire directors gapu iti mapapati nga anomalia iti panaggatang kadagiti fire truck manipod 2018 agingga 2024.
Mapapati a karaman dagitoy iti bid-rigging ken korapsyon a mangpangpangina iti presyo dagiti truck.
Mapapati a minanipulada ti technical specifications ken bidding rules tapno paboran dagiti napili a suppliers a gappuanan iti overpriced a fire truck.
Segun ken ni DILG Sec. Jonvic Remulla, ti 1,000-gallon fire truck nga aggatad laeng iti P5.97 million idi 2014 ket umabot iti P15 million ti presyo idi 2024 a naawagan a korapsyon ken saan a gapu iti inflation.
Gapu dayta ket sumangsango ti 45 BFP personnel pakairamanan dagiti dati a nangato nga opisyal kadagiti reklamo gapu iti mapapati a panagkikinnunsabus.
Ti panagipila kadagiti reklamo ket paset iti internal cleansing iti DILG iti BFP tapno malabanan iti korapsyon iti ahensya.
