Impatungpal ti Department of Education (DepEd) ti baro a pagannurotan iti lesson planning tapno makissayan ti paperwork dagiti mangisursuro ken maikkanda iti ad-adu nga oras para iti panagisuro iti uneg ti classroom.
Iti salinong ti baro a guidelines nga inruar ni DepEd Secretary Sonny Angara, naikkaten iti nagdumaan iti nagbaetan ti Detailed Lesson Plan ken Daily Lesson Log.
Nasukatan dayta iti nasimsimple ken flexible nga ILAW Framework wenno Intentions, Learning Experience, Assessing Learning, ken Ways Forward Framework.
Kinuna ni Angara a saan a rumbeng a saysayangen ti oras dagiti mangisursuro iti panagsurat iti atiddog lesson plan, ta ti napateg ket ti nalawag a gagem ti maadal, kinasagana ti mangisursuro ken makasursuro ti ubing iti uneg ti classroom.
Maiparit pay kadagiti regional ken division office, pagadalan ken learning center iti panagkiddaw kadagiti nayon a template wenno dokumento a naglabes iti naituding a pagannurotan ti DepEd.
Naisingasing ti collaborative lesson planning, panangibingay ti resources ken panagaramat ti digital tools.
