Nagpanawagan ti Department of Education iti publiko, media ken content creators a saanen nga iwaras dagiti sensitibo a video, ladawan ken saan a beripikado nga impormasion mainaig ti pammaltog iti Ateneo de Zamboanga University Junior High School.
Segun ti ahensia, ti agtultuloy a panagwaras kadagiti nadakamat a materyales ket mabalin a makanayon ti mapadasan a trauma ken distress.
Inallukoy pay ti DepEd iti publiko a mangnamnama laeng iti beripikado nga impormasion manipud kadagiti opisial a source bayat nga agtultuloy ti imbestigasion.
Nakipagrikna ni Education Secretary Sonny Angara kadagiti pamilia ken miembro ti school community a naapektaran ti insidente.
Imbilinen ni Angara ti DepEd Regional Office IX a makibinnulig iti pagadalan ken kadagiti maseknan nga ahensia ken siguradoen nga adda ti psychosocial support para kadagiti apektado nga estudyante, mangisursuro ken pamilia.
