In-activate ti Department of Education (DepEd) ti 4H emergency learning protocol-da kagiddan ti napigsa a tudo nga epekto ti Southwest Monsoon wenno Habagat, a nakasuspensoan dagiti klase idiay Metro Manila ken dadduma a probinsia.
Segun ti DepEd, masapul nga usaren dagiti pagadalan ti 4H protocol a ti kayatna a sawen ket Hinto, Hinga, Hinay ken Hayo, tapno mabigbig ti mayannatup a mode of learning kas maibasar iti kinatalged, kinasagana dagiti agad-adal, available resources ken local conditions.
Iti salinong ti protocol, mabalin nga agsuspenso dagiti pagadalan, aglukay, ag-adjust wenno agsubli iti learning activities depende iti safety conditions, learner readiness ken available resources.
Segun ken ni Education Secretary Sonny Angara, ti framework ket nadisenyo tapno maliklikan dagiti pagadalan manipod panag-adopt iti one-size-fits-all approach bayat iti emergencies.
Pinalagipan ti DepEd dagiti pagadalan ken field offices a mangisayangkat iti Education in Emergencies framework tapno masigurado ti kinatalged dagiti agad-adal, mangisursuro ken dadduma pay nga school personnel bayat nga ipalpalubos iti learning activities nga agtultuloy iti baet ti kondision.
