Inlawlawag ti Department of Social Welfare and Development Office Region 1 a para kadagiti maririgat nga estudyante ti maidiaya a Educational Assitance ti nasao nga ahensya.
Iti pannaki-uman ti Bombo Radyo Vigan kenni DSWD Assistant Regional Director for Administration Anniely Ferrer, nabayagen iti nasao a programa a mangtulong kadagiti walk-in nga estudyante nga agkasapolan ti tulong.
Ti dati a proseso iti nasao a programa ket babaen iti panangited ti rekomemdarsyon ti Local Government Unit ngem ita ket mabalinen nga agdiretso dagiti agadadal iti opisinada.
Iti salinong ti nasao a programa ket dagiti laeng estudyante a breadwinner, naampon, working students, pinanawan ti nagannakna nga agtaltalinaededn ti kabagyanna, annak ti distress OFW wenno dagiti namaltrato, nakaibalud, awan trabahona nga OFW, annak ti PWD in crisis, annak ti dati a rebelde ken PDL, biktima ti panagabuso ken dadduma pay.
Innayon ni Ferrer a nainget iti panangkitana kadagiti listaan ta saan a dakkel iti pondo a nailatang para iti nasao a programa ngem no pay kasta saanda a parigatan dagiti estudyante no maipanggep ti requirements.
