Nasapa a Paskua ti maawat ti mapatta-patta a 93, 000 a pampubliko a mangisursuro iti pagilian kalpasan a nagiruaar ti Department of Budget and Management (DBM) ti nayon nga P8.68 bilyon para iti salary upgrade mainaig iti naipatungpal nga Expanded Career Progression system.
Sakop ti nairuar a pondo iti salary differential dagiti kuwalipikado a personnel ti Department of Education a dagiti posision ket na-reclassify iti salinong ti ECP system iti fiscal year 2025 ken 2026.
Segun ken ni Palace Press Officer Atty. Claire Castro, imbilin ni Presidente Ferdinand Marcos Jr. ti panagiruar ti pondo iti Department of Education tapno suportaran ti expanded career progression system para kadagiti public school personnel iti intero a pagilian.
Pinasingkedan ni Castro a gagem ti addang a maikkan dagiti mangisusuro ti career achievement ken nangatngato a sweldo tapno saanen a pumawaw iti classroom.
