Saan nga insigida nga ibilang ti House prosecution panel a “hostile witness” da Gina Acosta ken Edward Fajarda a dati a kameng ni Vice President Sara Duterte a manamnama a sumango iti Senate impeachment court kadagiti sumarsaruno a lawas.
Segun ken ni Manila Rep. Joel Chua, kasapulan pay a makita ti prosecution no maaddaan ti kooperasyon da Acosta ken Fajarda iti panagtestigoda.
Ni Acosta ket dati nga special disbursing officer iti Office of the Vice President (OVP), idinto a ni Fajarda met ti special disbursing officer iti Department of Education (DepEd).
Kinunana a napateg iti testimoniada ta direktadada a karaman iti pannakairuar ti P612.5 million confidential funds a nagbalin a sentro iti Article I iti impeachment complaint kontra ken ni Duterte.
Immunan a kinuna ni Chua a posible a mapilitan a sumango iti impeachment court ti dua gapu kadagiti subpoena a nairuar kontra kadakuada.
