Imbasura ti Sandiganbayan ti kiddaw ni dati a Sen. Bong Revilla a temporaryo a makaruar iti pagbaludan tapno dumar-ay iti nakaimasayagan ti natay a kabsatna.
Iti pangngeddeng ni Associate Justice Karl Miranda iti Sandiganbayan 3rd Division, nakalanad nga awan iti umdas a legal basis tapno palubosan ti kidkiddawen a furlough wenno temporaryo a pannakawaya-waya ni Revilla tapno personal a makipagladingit iti pannakatay ti kabsatna a ni Jojo Bautista idiay Imus, Cavite.
No pay bigbigen ti Sandiganbayan ti panagladingit ti pamilia ket impaganetgetna a ti temporaryo a pannakawaya-waya ti maysa a detainee ket maipalubos laeng iti salinong ti limitado a sitwasyon.
Impaganetget ti Anti-graft Court a saan a maibilang nga emergency wenno compelling circumstance ti kiddaw ti dati a senador tapno agbalin nga exception dagiti maipatpatungpal a pagannurotan.
Nakalanad pay iti resolusyon a mapalubosan a makipagladingit dagiti nakabalud iti sabali a wagas kas iti panagawat ti bisita dagiti kabagyan iti detention facility, virtual a panagsali iti religious service ken pannakikammayet iti pamilia iti sabali a wagas.
Gapu dayta ket naibasura ti urgent motion for furlough ni Revilla gapu iti kinaawan ti merito.
