Impalubos ti Sandiganbayan Second Division ti panangibabawi wenno withdrawal ni Sen. Jinggoy Estrada iti mosyonna a mangkidkiddaw ti furlough wenno temporaryo a pannakawaya-waya manipod pagbaludan tapno makadar-ay iti impeachment trial ni Vice President Sara Duterte.
Gapu dayta, ti bilin ti korte a mangbilin ti prosecution nga agipasa iti komento ket opisyal a naibabawi ken naideklarar a moot ken academic.
Maibasar ti manifestation nga impila ti kampo ni Estrada, naaddaan ti kamali ta ti mosyon ket naipasa iti Second Division imbes nga iti Fifth Division iti Sandiganbayan.
Ti Fifth Division iti adda hurisdiksyon iti ayanna a pagbaludan ta isu ti mangig-iggem ti non-bailable a kaso a plunder maipanggep ti maanomalia a flood control projects.
No man pay nakapyansa ni Estrada ti P90,000 para iti naisina a kaso a graft iti salinong ti Second Division, agtaltalinaed isuna a naka-detain iti New Quezon City Jail idiay Payatas gapu ti plunder case iti Fifth Division.
Dumaldalan ni Estrada iti 90-day preventive suspension nga ipatpatungpal ti Senado manipod June 22.
Segun ti liderato iti Senado, ti suspension kas senador ket mangipasimudaag a saan isuna a mabalin nga agtugaw kas senator-judge iti impeachment trial ni VP Sara Duterte bayat a maipatpatungpal ti bilin.
