Nagsagaba iti tama ti paltog ti dati a kapitan ken ti kaanakanna gapu iti panangambush kadakuada dagiti saan pay nabigbig a suspek idiay Barangay San Antonio, Bangued, Abra.
Dagiti biktima ket da Marcelino Castillo Banayos, agtawen iti limapulo ket walo, dati a kapitan ken ti kaanakanna a ni Janssen Blanes, agtawen iti duapulo, agpada a taga-Sitio Saluden, Barangay Bañacao.
Nakalugan dagiti biktima iti puraw a Nissan Navarra a mapan idiay Barangay San Antonio idin ta maysa a nangisit a lugan ti nangovertake ken nangpaltog kadakuada, puon ti nakatnaganda ti luganda iti talon.
Apaman a makapagsikko dagiti suspek, pinaltuganda manen ti biktima sakbay a nagturongda idiay Mudeng, La, Paz, Abra.
Nagsagaba iti tama ti paltog iti kannawan a paset ti ulo ti dati a kapitan idinto nga iti akin-kannigid a takyag ken ulo met ti tama ti kaanakanna.
Naipaagas iti Abra Provincial Hospital dagiti biktima para iti naan-anay a pannakatamingda.
