Impaganetget ni Senador Bam Aquino a mayakar ti dakkel a paset iti P275 bilion flood control budget ti Department of Public Works and Highways para iti 2026 a mailatang iti sektor ti edukasion, iti baet ti imbestigasion iti mapapati nga anomalya ken ghost project ti ahensia.
Kalpasan a bimmisita kadagiti pagadalan idiay Mabalacat City, inyunay-unay ni Aquino ti kinakurang dagiti klarsum ken inallukoyna a mapalubosan dagiti LGU ken NGO a tumulong iti panangipatakder kadagitoy imbes nga ipanamnama man laengen iti DPWH.
Insingasingna pay ti Senate Bill No 121 wenno ti Classroom-Building Acceleration Program Act a ti gagemna ket ikkan turay dagiti LGU ken NGO a mangipatakder iti nailian a pagibasaran, ken masuportaran babaen iti national budget.
Segun ken ni Aquino, nadardaras ken nalaklaka ti konstruksion no mairaman dagiti LGU ken NGO nga adda naurnos a track record-na, ken daytoy ti tulbek tapno masulbar ti kurang a klasrum iti uneg ti tallo agingga lima a tawen.
