Nadismaya ni Agriculture Secretary Francisco Tiu Laurel Jr. iti sarita ni Vice President Sara Duterte a mangkukwestyon ti kalidad ti bagas a mailaklako iti P20 kada kilo.
Napasaktan ti secretary iti pinasingkedan bise presidente ta kasla ibagabagana a saan a para iti tao ti bagas nu diketdi para iti ayup.
Segun ken ni Laurel, arigna ininsultoen ti bise presidente dagiti mannalon nga agpakpakarigat nga agmulmula.
Pakaladingtanna pay ta mismo a ti bise presidente iti agsarsarita iti kasta a banag iti baet iti panangikarigatan iti gobierno nga agaramid iti addang, a rumbeng pay koma a karaman isuna.
Segun ti Department of Agriculture, dagiti rice program ket paset iti panagikagumaan ni President Ferdinand Marcos Jr. a matungpal ti campaign promise na idi 2022 tapno mapalag-an ti pinansyal a kasasaad ti pamilia a Pilipino kangrunaan kadagiti vulnerable sectors.
Impanawagan ni Secretary Tiu Laurel iti bise presidente a lipaten pay laeng ti politika ket makitinnulong laengen iti DA a mangpalag-an ti biag dagiti Pilipino.
