Kinarit ni Senate Minority Leader Alan Peter Cayetano ti national government iti panagaramid ti maysa a National Contingency Framework tapno maprotektaran dagiti overseas Filipino workers iti tengnga ti kumarkaro a tension idiay Middle East.
Pinasingkedan ni Cayetano a dakkel a buteng a mabalin a tamaan ti tension ti sabali a pagilian dagiti minilyon a Pilipino nga agtar-tarabaho iti ballasiw-taaw.
Impila ti senador ti Senate Resolution No. 343 a mangkid-kiddaw iti Executive Branch a mangbukel ti Comprehensive National Contingencies Plan tapno mapapigsa pay ti kinasagana ti pagilian iti darakkel a krisis iti uneg ken iruar ti pagilian.
Makatulong pay ti nalawag a contingency plan framework tapno mapadaras ken masimpa a makagaraw dagiti ahensia ti gobierno no adda krisis a makaapektar kadagiti Pilipino iti sabali a pagilian.
