Pinasingkedan ni Father Earl Valdez manipud idiay Vatican a saan pay a narugian ti proseso ti conclave wenno ti panagtataripnong dagiti cardinal ti simbaan tapno pagbobotosanda no asino ti sumaruno a santo papa.
Dayta ket kasaruno ti ipupusay ni Pope Francis idi Lunes iti tawenna a walopulo ket walo gapu iti stroke ken ‘irreversible’ heart failure kas maibasar iti death certificate-na.
Iti pannaki-uman ti Bombo Radyo Vigan ken ni Fr. Valdez, uray no adda dagiti rimuaren a nagan a posible a sumukat ken ni Pope Francis ket saan pay nga isu ti as-asikasoen ti simbaan agsipud ta maipangruna pay laeng ti pannakaikararag iti Santo Papa.
Ti pay laeng napagpapatangan ket ti pannakaitabonna idiay Santa Maria Maggiore a masansan a pagkarkararagan ti Santo Papa no agbibiahe.
Iti agdama, sagsaganaandan ti simple a ritwal ti pannakaitabonna inton Sabado.
