Allukoyen ti Commission on Elections (COMELEC) iti Bangko Sentral ng Pilipinas (BSP) a saan a patgan ti kliyenteda nga agpasukat ti kuarta sakbay iti election day tapno saan a maguyugoy dagiti kandidato nga aggatang ti botos.
Segun ken ni Comelec Chairman George Garcia, ti panagsukat ti kuarta iti basbassit a gatad a kas ti P100 wenno P200 ket rumbeng a maiparit, makalawas wenno dua a lawas sakbay iti eleksyon.
Kinuna ni Garcia a ti kandidato ken team-na ket saan a mangted ti P1,000 bill iti tunggal botante ta ipasuklida tapno kasla ad-adu iti maitedda kadagiti botante.
Babaen ti proposed measure ket namnamaen ti Comelec a makissayan ti duapulo agingga duapulo ket lima a porsiento iti vote-buying incidents.
Impaganetgetna pay a saan a mapaspasamak ti vote buying iti makabulan sakbay iti eleksyon ta masansan a mapasamak iti dua wenno tallo nga aldaw sakbay iti eleksyon.
