VIGAN CITY – Takderan ni Commission on Elections (Comelec) spokesman James Jimenez nga awan iti napasamak a panagwistik iti kalkalpas a midterm elections idi May 13.
Dayta ket iti laksid nga adu dagiti mangibagbaga a naswitik ken saan a mapagtalkan iti resulta ti eleksyon.
Segun ken ni Jimenez, iti pannaki-uman kenkuana ti Bombo Radyo Vigan, nu dagiti isyu ti vote buying ken dagiti nadadael wennu nagpalya a vote counting machine iti pagpapatangan, awan iti direkta nga epekto na iti sistema a nausar idi eleksyon ken saan na a maibilang a wagas iti panagswitik dagiti napasaran a parikot idi eleksyon.
Inlawlawag ti Comelec spokesman a nu adda man ti epekto ti isyu ti vote buying idi eleksyon ket isu iti saan a panangibotos dagiti tattao kadagiti kayat da nga ibotos a kandidato ta nagatangen iti botos da idinto a ti ti laeng epekto iti eleksyon dagiti nadadael wennu nagpalya a makina ket adda dagiti botante a saanen a nagbotos ta masuron da ken saan da a makauray a masimpa wennu masukatan dagiti nasao a makina.
