Nakasagana ti Commission on Elections (COMELEC) a sumurot nu kas bilang maaddaan iti linteg tapno mangisayangkat ti snap elections.
Ti addang ket sarita ti Comelec kasaruno ti singasing ni Senador Alan Peter Cayetano a rumbeng nga agikkat dagiti agdama nga opisyal ken mangisayangkat laengen iti snap elections.
Segun ken ni Comelec Spokesperson Director John Rex Laudiangco, awan iti bileg ti poll body a mangngeddeng ngem sumurotda nu kas bilang mangipasa ti Kongreso ti linteg a mangimplementar iti nasao a singasing.
Linagip ni Laudingco iti snap elections a naisayangkat idi 1986 a kinasapulan ti maysa a linteg sakbay a naisayangkat.
Mainaig dayta ket kiddawen ti Comelec iti umanay a panawen tapno maipatungpal a nasayaat iti eleksyon.
Karaman iti agbalin a panagsagana ti procurement ti automated election system, dagiti posible a panagkwestyon ti certificate of candidacy (COC) ken panag-imprenta kadagiti balota.
