VIGAN CITY – Inbalakad ni Commission on Election (Comelec) spokesman James Jimenez babaen iti pannaki-uman kenkuana ti Bombo Radyo Vigan a nu maisayangkat iti Debate sa Bombo ditoy probinsiya ket masapul a mapaayaban amin a kandidato iti maysa a partikular a posisyon kas kuma iti kina-gobernador ken kina-mayor iti ili.
Segun kenni Jimenez, nu adda iti saan a makaumay a kandidato, napinpintas nu adda iti bakante a tugaw a makita dagiti tattao tapnu maamuan da nu siasino ti kandidato a nagsanud wennu saan a nakipaset iti debate.
Namnamaen ti opisyal nga agalerto, agsipot a naimbag ken saan a nalaka a mamati dagiti botante kadagiti rason dagiti kandidato nga adu ti nakakumikuman da ken adda ti napanan da a sabali nga aktibidad isu a saan da a nakaatendar iti debate.
Inton umay a lawas ken maikapat a lawas iti agdama a bulan ket isu iti manamnama a pannakaisayangkat iti dua a serye iti Debate sa Bombo ditoy probinsiya ta immanamongen dagiti kandidato a naawis nga agdebate.
